امام اکبر  پروفیسر ڈاکٹر احمد الطیب، شیخ الازہر  شریف نے منگل کے روز مملکتِ بحرین کے بادشاہ عزت  مآب حمد بن عیسیٰ آل خلیفہ سے ٹیلیفونک رابطہ کیا، جس میں انہوں نے الازہر کی جانب سے مملکتِ بحرین کے ساتھ مکمل یکجہتی کا اظہار کیا اور ریاستوں کی خودمختاری پر کسی بھی قسم کی دست درازی یا عوام کے امن کو لاحق کسی بھی خطرے کو مسترد کیا۔

انہوں نے اس بات پر زور دیا کہ موجودہ مرحلہ عرب و اسلامی دنیا کی مشترکہ کوششوں کا متقاضی ہے تاکہ استحکام کو برقرار رکھا جا سکے، ممالک کے اتحاد و یکجہتی کی حفاظت کی جا سکے، اور عقل و حکمت کی آواز کو غالب کرتے ہوئے بحرانوں پر قابو پایا جائے اور خطے کو مزید کشیدگی اور تنازعات سے بچایا جا سکے۔ نیز انہوں نے اللہ تعالیٰ سے دعا کی کہ وہ مملکتِ بحرین اور اس کے  عوام کی حفاظت فرمائے اور ہمارے ممالک اور پوری دنیا کو امن، سلامتی اور استحکام عطا کرے۔

دوسری جانب، بحرین کے بادشاہ نے اس برادرانہ اور کریمانہ اقدام پر امام اکبر  شیخ الازہر کا شکریہ ادا کیا اور امن کے فروغ کے لیے ان کے اور جامعہ الازہر کے مؤقف کو سراہتے ہوئے اس بات کی توثیق کی کہ ان کا ملک علاقائی اور عالمی استحکام کے فروغ کے لیے ہر ممکن کوشش کا خواہاں ہے۔