عزت مآب امام اکبر پروفیسر ڈاکٹر احمد طیب شیخ الازہر شریف کو قبطی آرتھوڈوکس کلیسا کے پوپ اور بطرکِ کرسیِ مرقس، پوپ تواضروس ثانی نے ٹیلی فون پر رابطہ کرکے عیدالاضحیٰ کی آمد پر مبارک باد پیش کی۔ انہوں نے بارگاہِ الٰہی میں دعا کی کہ یہ بابرکت موقع ہمارے عزیز وطن مصر اور اس کے عوام کے لیے امن، خیر و برکت اور استحکام کا پیغام بن کر بار بار آئے، اور اہلِ وطن کے تمام طبقات کے مابین محبت، اخوت اور باہمی یگانگت کی روح ہمیشہ مستحکم اور پائیدار رہے۔

پوپ تواضروس ثانی نے امامِ اکبر کی قیادت میں ازہر شریف کی جانب سے ادا کیے جانے والے قومی اور انسانی کردار کو خراجِ تحسین پیش کرتے ہوئے امن و رواداری کی اقدار کے فروغ، مکالمے اور باہمی تفاہم کی ثقافت کے فروغ، نیز مصری معاشرے کے تمام افراد کے مابین شہریت کے جذبے اور مثبت بقائے باہمی کو مضبوط بنانے کے لیے الازہر کی کاوشوں کو سراہا۔

دوسری جانب، امام اکبر نے بابا تواضروس ثانی کی اس پُرخلوص تہنیت پر اپنی گہری قدردانی کا اظہار کیا اور اس امر پر زور دیا کہ دینی تہوار اور مذہبی مناسبتیں محبت کے رشتوں کو مزید مستحکم کرنے، قومی یکجہتی و اتحاد کو فروغ دینے اور ان مشترکہ انسانی اقدار کو مضبوط بنانے کا ایک نیا موقع فراہم کرتی ہیں جو ملک و قوم کی بھلائی کے لیے باہمی تعاون اور یکجہتی کی دعوت دیتی ہیں۔

امامِ اکبر اور بابا تواضروس نے «بیت العائلۃ المصریۃ» (مصری خاندانی گھر) کی کاوشوں اور مختلف اقدامات کو بھی سراہا، جو معاشرتی امن و سلامتی کے فروغ، تعصب و نفرت کے انسداد اور مصر کے قومی و سماجی تانے بانے کے تحفظ کے لیے ایک مثالی اور منفرد قومی نمونے کی حیثیت رکھتا ہے۔